Wapenzi wa zamani, Diamond na Wema Sepetu jana waliendelea kuiteka mitandao ya kijamii baada ya kusambaa video ya salamu za kupetipetiana, jana usiku waliibuka na mengine.
Wawili hao ambao walihudhuria ‘Makulusu Challenge’, shindano la kucheza makulusu la mmoja wa wanafamilia wa WCB, Ray Vanny katika ukumbi wa Maisha Basement jijini Dar es Salaam waliwasha cheche nyingine za mapenzi.
Wema alipewa nafasi ya kumkaribisha Diamond Platnumz jukwaani kwa kuwa-surprise mashabiki ambapo aliikamilisha vyema kazi yake na kuzua shangwe kubwa ukumbini hapo.
Hata hivyo, shangwe zaidi iliibuka baada ya Diamond kumpa kumbato la salamu, kukipokea kikuza sauti (microphone) na kisha kuamsha na ‘I love you die’, wimbo alioshirikishwa na Patoranking wa Nigeria.
Uchaguzi huo wa wimbo uliongeza chachu ya shangwe ukumbini hapo kutokana na ujumbe wake wa kumhakikishia mpenzi kuwa unampenda sana hata kifo.
Katika hatua nyingine, Diamond ameandika kwenye Instagram ujumbe wa kutetea alichokifanya yeye na Wema kwenye hafla ya kumkaribisha Mbosso kwenye WCB, akiwataka mashabiki kuelewa kuwa wao ni marafiki na haitaji kudumisha uhasama ndio sababu alimualika Wema.
Hata hivyo, Chibu hakuzungumzia hatua za mapozi ya ndege tetere yaliyoibuka kati yao mbele ya mapaparazi.
